Күпер янган, кичү тирәнәйгән.
Юллар кысан, юлларда - сөяк.
Чыгу-керү урыннары бәйдә,
Мин дә - көтүдәге бер көек...

Сукыр атлар кебек, бу дөньяның
Кысанлыгын кабат исбатлап,
Бер түгәрәк буйлап чаба көтү,
Сукмак-гомерен битараф ятлап...

Ага рәссам кулындагы буяу,
Хәвеф яңгырына эләгеп:
Төсләр, исләр, көйләр юк буладыр -
Кислородсыз калса тирәлек.

Бу дөньяның торышларын һичбер
Дуамаллык, илһам тыялмас.
Шушы түгел микән мәңге алга
Омтылучы юллар тулы яз?