Минем хакта әйтәләр: ул, әлбәттә, гений түгел шул.
Әйе, риза - минем белән горурланмыйлар бүген,
Интеграллар чутлый белмим, айкамыйм галәм күген,
Интеллектым тарта алмый бу техник гасыр йёген.

Бер мәлне мин әйткән идем: «океан - бассейн кебек!»
Дустым, шуны аңламыйча, һаман суыра җелек, -
Әмма хәтта бөек Энштейн, фәннәрне төптән белеп,
Өйрәткән: чагыштырмача була бездә даһилык.

Мин бушлат турында матур итеп шигырьләр яздым,
Җырын яздым! Бик охшатты үлеп китүче аздан
Палатадашым - сердәшем, шул шигырьдәге наздан
Төннәр буе елый-елый, гүя акылыннан язган.

һәрнәрсә турында язам: җәнлекләр һәм үләннәр,
Хәтта кешеләр турында язасы идем, әгәр
Редакциядә кыйналмасам, кумасалар бик зәһәр,
Шуңа күрә: - Сау бул, Муза!-диясе булдым, каһәр!..

Сез кызык түгел, диделәр - Ниццада юк булганым.
Иҗатымда аеруча кар һәм суларны юлладым...
Әгәр дустым исерек баштан кылмаса соңгы адым,
Хастаханәдә бергәләп көйләр идек җырларны!..

һәм, ниһаять, мин уяндым бик газаплы йокыдан,
Саташулардан уяндым - гүя чыктым чокырдан, -
Ап-ак бизгәктән айныдым - гүя сикердем ярдан:
Шигырь язарга тотындым, яңа бизгәкләр бардан!..