«Уруғ ташлаб оввора бўлманг,
Замин тамом куйди» деган ким?
Ким - Заминни ўлди деб айтган, -
У фақат бир лаҳза қолди жим.

Оналиги - Ернинг туганмас,
Бўлганидек денгизга сув хос.
Ким ишонди Замин куйди деб,
У андуҳдан қорайди холос.

Ўйиқ ўхшар дардбахш ярага,
Бу хандақлар - чавақланган тан.
Замин биздек сезгир жисми-ла,
Дардларни ҳис қилар дафъатан.

Ногиронлар сафига қўшманг
Барчасига мағрур чидар у,
Ер куйламас дея ким айтди,
Ким айтди: Ер сукутда мангу?

Йўқ, ўлмаган, Она Ер сўзсиз,
Вужудидан артмоқда қонни.
Замин ахир бизнинг жонимиз,
Ахир топтаб бўларми жонни?!

Замин ўлди дея айтар ким?
Бир муддатга қолгандир у жим.