Ich bin ein exotischer Mann, fer es weenichstes saan,
Was ich kėrn hon un wunxe sin xpasich kerechent fon te layt:
Ich khan, in te selwich tsayt, ti prile knepre oone kontrol
Un leese, im orikinaal, Platoon sayn xrifte.
Es kept tswaay "Ich Selepst", tswaay keeche phoole in mich,
Tswaay apsolut ferxiitne mėner, tswaay faynte:
Wėn eene lustich is fer ti pipliotėk pesuuche,
Richt in ti wėnte, meecht te anere tsiie.
Ich nėme khee frayheete, wėn te opjektiif
Is ich selepst sin, tan kewe ich tas kanse xwayn,
Awer oft mool tuut mayne anere "Ich" mich ferxpeete
Fer en ėngel sin, un khomt ans licht en uneerliche.
Un ich xteen keeche, petrike ti intrikung fon tee uneerliche.
Mayn Kot! Ich hon mayn taache in kroose noot rom keprung -
Es khan paseere (Ich hon soo pang fon unortnung)
Tas es is mayne aychentliche "Ich" woo ich petrike.
Wėn in mayn seel ich uf mache ti fasete
Uf plets woo ich eerlich sin ti kans tsayt,
Ich fare mit taxi petsaale ploos in aktiif
Un garēonetes fitre mich ploos fer een musik.
Awer, pletslich al may iteaale keen uf es kraas, wii
Ich sin ferkeslich, pees, krop un soo laytich!
Ich sitze wii en ferikte un ferpayse ti prile,
Soo lang wii Platoons aarwate sin uf em potem ferxtraut.
...Ti aanheerung is aan. Ich xteen un xpreche ėrnst
(Am pite fer te juuri, ich wayse kefiil),
Tas waar net ich woo tii witrine ferproch hat, klaapt mich,
Es waar mayne anere peese "ich", in te woerheet.
Sayt net tsuu xtrėng in ayer pexultichung, teet liiwer
kewe mich en tsayt, awer khee katee tsayt -
Ich wėre ti kerichts saale als pesuucher aan kuke,
Te juuri wėret mayne peste foynte sin.
Ich wėre khee klaas mee ferxlaan, eerlich,
Net mool mayn nachpar xlaan - xrayp tas in ayre pleter!
Ich wėre ti helefte fon mayn krėnklich seel witer ferayniche
In en fayne un hayliche kanse.
Ich wėre es aus rope, ins kraap leye un aus mache,
Ich wil mayn seel fer ale mėnxe uf mache!
Mayne anere "Ich" is frėmt fer mayn natuer,
Nee, yets is es net mayne anere "Ich", ėntlich mool.
|